Anak giunay pagluba sa amahan

CEBU, Philippines - Nabalhog sa prisohan ang usa ka amahan kinsa miunay pagdunggab sa iyang menor de edad nga anak didto sa ilang balay sa dalan Urgello, barangay Sambag 1, dakbayan sa Sugbo kagahapon sa ala 1:00 pasado sa hapon.

Ang 17 anyos nga biktima nagtungha sa University of Cebu sa kursong Bachelor of Science in Information and Technology (BSIT).

Samtang ang suspetsadong amahan giila sa kapolisan sa Cebu City Police Office (CCPO) nga si Benjamin Tudtud Jr.

Si PO3 Lou Pagara sa homicide section sa CCPO mibutyag sa Banat News nga ang biktima bag-ohay lang nga miabot gikan sa eskuylahan dihang gitagbo kini sa iyang amahang lasbag.

Midugang si PO3 Pagara nga imbis agdahon og paniudto, ang biktima gisugo hinuon sa paghinlo sa ilang imbornal , apan gumikan sa kagutom mibalibad ang naulahi.

 Unya gumikan kay gibati og kahiubos sa iyang amahan, buot unta kining mopahungaw sa iyang kahiubos ngadto sa iyang uyoang si Novir kinsa bag-o lang nahiabot niadtong tungora.

Apan wala siya makalahos sa pagsumbong ngadto sa iyang uyoan dihang gitaruyan ang iyang bukobuko sa ice pick nga gihansak sa iyang amahan.

Dihadiha gihatod dayon kini ngadto sa Sacred Heart Hospital samtang ang suspetsado gisikop usab dayon sa kapolisan ug nagpahayay na siya karon sa prisohan.   (BANAT NEWS)