Menor giluba sa Trese Hudas

CEBU, Philippines – Naangol ang usa ka menor de edad dihang gidunggab kini sa duha ka batan-ong sakop kuno sa Trese Hudas gang sa sulod sa viedokehan sa dalan Maximo Patalinjug, barangay Pajo, dakbayan sa Lapulapu sa miaging gabii.

Si PO3 Candido Baringue sa homicide section sa kapolisan sa maong dakbayan miila lamang sa biktimang 15 anyos nga si Johnny (di tinuod niyang ngalan), samtang ang miluba kaniya kinsa pulos usab 15 anyos ang edad giila lang sa mga ngalang si Peter ug si Tommy (di tinuod nilang mga ngalan) mga miyembro kuno sa Trese Hudas gang, ang tanan pulos ra taga Lapulapu City.

Matud pa ni PO3 Baringue nga sa wala pa mahitabo, ang biktima kauban sa iyang mga barkada nag-inom sa usa ka lamesa sulod sa videokehan, samtang didto usab moinom sa laing lamesa ang midunggab kaniya.

Nasayran ni PO3 Baringue nga daan na diay’ng nagdinumtanay ang biktima ug ang mga criminal ug nataymingan lang nga nagkaabot sila didtong dapita.

Midugang si PO3 Baringue dihang nangalasbag na, miduol dayon ang duha ka criminal sa lamesa sa biktima ug didto nagsugod ang lalis, ug tungod kay daan nang nagdumot, gilanit dayon sa usa sa duha ka criminal ang kutsilyo niining gitangkil ug gihansak ngadto sa tiyan sa biktima.

Ang mga barkada sa biktima kinsa nahadlok nga mapagan, nag-iyahay sa pagpanagan sama sa iro nga mibahag ang ikog sa kahadlok.

Gihatod dayon ngadto sa Lapulapu District Hospital ang biktima samtang ang usa sa duha ka kriminal mao ray nasikop sa kapolisan ug tungod kay menor de edad tua kini karon sa buhatan sa City Social Welfare and Development Office sa Lapulapu. – Romeo T. Lipangog (BANAT NEWS)