CEBU, Philippines - Subling gitun-an sa mga sakop sa konseho sa siyudad sa Sugbu sa napirmahang kasabutan sa dakbayan tali sa Filinvest Land Incorporated may kalabutan sa pagpalit og napulo ka ektaryang luna niini diha sa South Road Properties (SRP) ug paggamit sa laing 40 ka ektarya pinaagi sa joint venture.
Matud pa ni acting mayor Hilario Davide III nga ang pagtuon og balik sa Filinvest deal maoy kabahin sa ila karong gihimo nga pagpangandam sa planong pagpahigayon og congressional inquiry nga gitinguha sa mga opisyal sa lalawigan sa Sugbu.
“Kinahanglan gyud nga mangandam ta kay kung mahinayon nang inquiry pangutan-on unya ta, makahibawo ta kung unsay atong tubag,” sumala ni Davide.
Nakasiguro hinuon ang acting vice- mayor nga nasuhito ang mga konsehal sa Filinvest deal sukwahi sa pangagpas ni Gobernadora Gwendolyn Garcia.
Kini tungod kay ang mga konsehal giingong niapil sa delebirasyon dihang ang kasabutan gipaubos sa makuting pag-review sa City Council.
“Dili na mahimo nga amo lang na nga i-approve nga dili mi mamasa kay required man gyud na, dako gud na nga transaksyon,” dugang pamahayag ni Davide.
Sama sa ubang mga opisyal sa siyudad gipadayag usab sa acting vice- mayor nga walay iregularidad ang gisudlan nga kasabutan sa kagamhanan sa dakbayan.
Una na hinuong nagduda si Davide nga usa lang ka pagpanglawgaw ang motibo sa mga opisyal sa probinsya sa nahuna-hunaang plano niini.
Apan bisan pa sa maong motibo niingon ang acting mayor nga andam gihapon ang mga opisyal sa siyudad sa pagpanalipod sa Filinvest deal.
Si Kongresista Pablo John Garcia maoy nangusog nga dunay mapahigayong congressional inquiry sa Filinvest deal tungod sa iyang pagduda nga kini dunay anomaliya. - Elly Bolonos (BANAT NEWS)