PNP ug CENTCOM gidayeg ni Garcia

CEBU, Philippines - Gipasalamatan ni Gobernador Gwendolyn Garcia kagahapon ang hepe sa kapolisan sa lalawigan, nga si Sr. Supt. Carmelo Valmoria ug ingon man ang mga sakop sa Armed Forces of the Philippines Central Command atol sa ika-21st nga founding anniversary sa 78IB

Kini human masikop sa kapolisan ug AFP-Central Command ang giilang number two leader sa Communist Party of the Philippines-New Peoples Army (CPP-NPA) nga si Ramon Patriarca.

Si Garcia maoy pinasidunggang dinapit atol sa maong anibersaryo ug mipadayag sa walay puas niyang suporta ngadto sa kasundalohan ug kapolisan tungod kay usa usab kini sa iyang kampanya nga mapuhag ang rebeldeng kumunista dinhi sa lalawigan sa Sugbu.

Gipadayag usab ni Garcia nga mikabat na sa 23 ka mga gidudahang sakop sa rebelde ang misurender ug mibalik na sa sabakan sa balaod.

Gani matud pa niya nga aduna pay laing mosurender nga mga rebelde karong umaabot nga mga adlaw.

Mitambong usab sa maong kalihokan ang mga mayor sa Tuburan, Asturias, Pinamungahan, Sogod, San Remegio, Ronda, ug Boljoon. Kauban nila ni Sr. Supt. Valmoria ug Sr. Supt. Vicente “Vic” Loot, Regional Staff sa PRO-7.

Ang gobernador gihatagan sa hepe sa Central Command Major General Armando Cunanan og plaque of appreciation gumikan sa walay kinutobang suporta niini sa kapolisan ug kasundalohan nga nakiggubat batok sa mga rebelde dinhi sa rehiyon. - Rey B. Pasaporte (BANAT NEWS)