Wala pay ebidensya batok sa suspek sa pagsignit sa dalaga

CEBU – Buhian sa kapulisan sa lalawigan sa Sugbu ang ilang gi-hold nga tinun-an nga gikatahong nalambigit sa pagdagit ingon man paglugos sa 18 -anyos nga dalaga sa Bogo niadtong petsa 24 sa Enero ning tuiga.

Kini maoy gibutyag ni Chief Insp. Elma Delos Santos, hepe sa Provincial Investigation Branch (PIB) human usab wala silay igong ebidensyang magtumbok kang Mark Comahig, 21, nga taga Nailon dakbayan sa Sugbu.

Nasayran nga si Comahig boluntaryong mitahan sa iyang kaugalingon ngadto kang Bogo City Mayor Celestino “Junie” Martinez niadtong miaging adlaw.

Sumala pa niini nga kun maabot na sa 36 hours karong Martes unya wala pay dugang ebidensyang makuha batok kang Comahig ila kining buhian gikan sa karsel sa kapulisan sa dakbayan sa Talisay.

Samtang gibutyag niini nga ang anggulo sa fraternity ila karong gisubay kini tungod kay ang biktima mitug-an nga dunay usa ka babayeng nangayo kaniya’g pasaylo nianang gabii sa wala pa siya makasibat.

“Ang anggulo sa fraternity among gisubay kay ang biktima nitug-ang dunay babaye’ng nangayo niya’g pasaylo sa gibuhat sa wa pa siya makabuhi..samtang dihang gipanghikap ang iyang pribadong parte sa lawas, gibadlong sa maong babaye nga di siya pahilabtan ug migamit kini sa pulong nga bro,” matud pang Delos Santos.

Dugang pa niini nabantayan sa biktimang pulos nagsul-ob og itom nga t-shirt ang mga suspek.

Ang biktima kinsa anak og usa ka pastor gihulagway sa kapolisan nga motubag na sa ilang mga pangutana apan nagdumili gihapon sa pagpahiling sa mga doktor.

Ang biktima nitug-an nga gisulod siya’g tangkal ug gitaptapan ang iyang mga mata ug hungitan lang siya sa mga suspetsado panahon nga siya pakan-on.

Subay niini ila karong gipanawagan ang mga residente diha sa Bogo partikular na sa may merkado duol sa usa ka bakery diin gidagit ang biktima sa duha ka mga lalaki sakay sa brown o maroon nga van sa pagpatim-aw sa ilang buhatan.

Gipangita karon sa kapolisan ang walang pares sa itom nga tsinelas sa biktima, ang tuong pares narekober diha na sa barangay Sagay, dako ang pagtuo sa kapolisan nga posibleng nahabilin pa ang walang pares sa van.

Nasayran nga ang biktima nakadagan human giingong mihapit pa og pangawat og kanding ang mga suspek diha sa barangay Sagay lungsod sa Borbon niadtong petsa 30 sa bulan sa Enero. (Guam Logroño) (BANAT NEWS)