Enfectana gipaubos inquest proceeding

Cebu - Gihimo ang inquest proceeding kagahapon sa kasong pagpatay sa usa ka call center supervisor diin ang suspek nga gitumbok mao ang higala niining si Jonelle Enfectana.

Samtang upat pa ka laing kaubanan sa suspek ang gipangita sa kapolisan kabahin sa pagpatay kang Lyn-Vi Ebarita kansang patay’ng lawas gisulod sa plastic bag sulod sa usa ka room sa Nikkie Garden Hotel.

Si Enfectana nga gidakop sa kapolisan sa Mandaue City Hospital nga gihimo untang saksi pag-ila sa mga mamumuno ni Ebarita apan gumikan sa mga personal nga gamit ni Ebarita nga narekober diha sa iyang balay giisip siyang usa sa mga suspek.

Ang biktima ug Enfectana suod nga managhigala ug kauban sa trabaho sa Tele Tech Customers Care Center sa dalan A.S. Fortuna sa barangay Banilad, dakbayan sa Mandaue.

Ang Investigation Detection and Management Bureau (IDMB) nga gipangulohan ni Chief Inspector Eddie Recamara mipresentar sa maong mga ebidensya batok sa suspek nga naglakip sa pitaka sa biktima nga may mga sulod nga personal nga dokumento ni Ebarita.

Apan kini gikwestyon ni Atty. Manuel Enriquez, abogado ni Enfectana lakip na ang paagi sa pag-aresto sa iyang kliyente nga walay warrant of arrest.

Si Enfectana nga lumad nga taga dakbayan sa Tacloban ang gialegar nga kuyog sa upat pa ka suspek niadtong Enero 18 diha sa maong hotel.

Sa nasayran nga si Enfectana maoy nanawag sa Mandaue City Police Office ug miboluntaryong mohatag og kasayuran pag-ila sa mga mamumuno.

Dihang gikuhaan sa mga imbestigador sa iyang pamahayag wala kini magkadimao ug nakuyapan hinungdan nga gidala kini sa tambalanan. - Romeo Limpangog (BANAT NEWS)