Drug pusher sikop sa buybust operation

Cebu - Usa ka notadong drug pusher nasikop sa kapolisan samtang ang kaubang babaye niini nakaikyas atol sa buybust operation didto sa Brgy. Mactan dakbayan sa Lapulapu sa milabay’ng gabii.

Ang nasikop mao si Jesus Baring alyas Into, 24 , nga taga Mactan kinsa ilado kaayo sa pagpamaligya og illegal nga drugas sama sa shabu ug uban pa.

Samtang ang kauban niya nga si Ma. Elena Paquibot Saludaga, hingkod, minyo nga iya ra usab nga silingan, nagpahayahay karon kay nakasibat kini ug wala hidakpi sa kapolisan nga mironda sa ilang hideout.

Nasakmit gikan sa suspetsado mao ang siyam ka gagmay’ng pakete nga shabu, P200 nga marked money ug P400 cash nga posibleng halin sa baligya nilang shabu.

Gibutyag ni P/Insp. Raymundo Rodriguez ,Hepe sa Operation Section sa kapolisan sa Lapulapu City nga dugay na nilang gipanid-an si Baring sa illegal niyang pamatigayon.

Gilakip si Saludaga sa kasong gipasaka nga may labot sa Sec. 5 Art.II sa RA 9165 bisan wala kini hidakpi. - Bong Soriano (BANAT NEWS)