CEBU - Pabiling alerto ang Cebu City Disaster Coordinating Council (CCDCC) tungod sa bag-ong niabot nga bagyong Rolly nga nisulod gihapon sa Sugbu.
Ang chairman sa CCDCC nga si Konsehal Gerardo Carillo miingon nga kini tungod sa pagpaubos sa Sugbu sa tropical storm signal number 1sa Pagasa.
Ang bagyong Rolly nga maoy nisunod sa bagyong Quinta nga dili pa lang dugay nigawas sa nasod, gikatahong nagdala og kusog nga pag-uwan.
Kini maoy gikabalak-an ni Carillo ilabi na niadtong namuyo daplin sa kasapaan ug sa mga bukirang barangay sa dakbayan nga landslide prone areas sama sa Sinsin, Pamutan, Sudlon barangay Taptap ug uban pa.
Tungod niini nipahimangno si Carillo nga mohiklin una kadtong namuyo daplin sa kasapaan ug sa mga dapit nga delikado sa pagdahili sa yuta.
“Sa mga areas nga atong gi-identify nga landslide prone kinahanglan gyud nga mubakwit una, unya kadtong namuyo daplin sa sapa muhiklin sab,” sumala ni Carillo.
Sa susamang kalamboan gitigom usab sa konsehal ang mga sakop sa CCDCC kagahapon ug sa makausa pa gihisgutan ang ilang mga pagpangandam lakip na ang pag-activate sa Barangay Disaster Brigade sulod sa 24 oras.
Ang tropical depression nga Rolly mao na ang ika-18 nga bagyo nga nibisita sa nasod sulod niining tuiga.
Sa pagsuwat ning balita wala pa hinooy nadawat nga taho ang CCDCC nga duna nay gimugna nga kadaut ang nahisgutang bagyo dinhi sa siyudad. – BANAT NEWS