Memo kang Manreal 'insulto'

CEBU - Gikwestiyon kagahapon sa buntag ni Konsehal Rodolfo Cabigas atol sa ilang regular nga sesyon ang memorandum nga giisyu sa kalihim sa Sangguniang Panlungsod (SP) ngadto sa ex-officio member nga si Osmundo Manreal Jr..

Ug matud sa konsehal insulto ngadto sa bise mayor ug sa konseho sa dakbayan ang dokumentong giisyu ni Emigdio Enjambre og memorandum ngadto kang Manreal tungod sa pag-walk out niini sa sesyon niadtong Oktobre 14.

Si Cabigas sa iyang privilege speech nagkanayon nga wala siya’y problema kang Bise Mayor Lani Abarquez nga mi-reprimand ni Manreal apan gikwestiyon niya ang pagpirma ni Enjambre og memorandum ngadto kang Manreal.

Matud ni Cabigas nakalapas sa house rules sa konseho si Enjambre sa pagpahigayon sa official function.

Ang konsehal nagkanayon nga kun si Enjambre gihatagan og pagtugot ni Abarquez nga moluwat sa maong memorandum aduna unta kini note o pirma sa bise mayor.

Apan si Abarquez sa “letter of clarification” nga gihatag niadtong Oktobre 27, 2008 nagkanayon kini nga iyahang gisugo si Enjambre nga mo-isyu og ‘notice of reprimand” ngadto kang Manreal.

Si Abarquez kinsa on leave kagahapon ang nagkanayon usab sa iyang suwat nga usa lang ka “notice” ang giisyu ni Enjambre ug dili na kinahanglan nga mopirma pa siya niini.

Apan si Cabigas nagkanayon nga bisan sa clarification letter sa bise mayor wala gihapon kini makawagtang sa depekto sa giingong memorandum nga giluwatan ni Enjambre niadtong Oktobre 17, 2008.

Si Enjambre sa iyang bahin, nagkanayon kini nga usa lang ka “notice’ ang iyang giisyu ug igo lang siyang misunod sa sugo sa bise mayor nga maoy iyang labaw diin ubos usab kini sa Local Government Code.

Base sa Local Government Code nga ang council secretary mosunod sa iyang supervisor ug kini mao ang bise mayor. (BANAT NEWS)