Kritikal ang kahimtang sa usa ka mananagat human kini maligsi ug matabas sa propeller sa usa ka tourist pumpboat sa kadagatan sa sitio Buyong sa barangay Maribago dakbayan sa Lapulapu kagahapon sa buntag.
Ang biktima mao si Joseph Pangatungan, 30, taga Bagong Bayan barangay Maribago dakbayan sa Lapulapu ug usa ka mananagat.
Base sa pasiunang imbestigasyon ni SPO1 Frederek Eslit, PO1 Reynaldo Sumampong ug PO1 Jumar Ortiz sa homicide section nasayran nga namana si Pangatungan sa ilawom sa dagat sa maong dapit niadtong tungura.
Ang nakaligis kaniya mao ang M/B Robert Jay (usa ka tourist pumpboat) nga gidala ni Miguel Ayento Abrasada, 35, residente sa barangay San Vicente Isla sa Olango.
Atol sa pagtunga niini human mosalom wala siya makabantay sa pumpboat nga nagpadulong sa ibabaw sa iyang tungahan hinungdan sa pagkaligis kaniya sa kasko niini.
Matud pa ni Abrasada nga wala usab siya makabantay nga adunay namana sa ilawom sa iyang agian gumikan kay kanunay na niya kining rota matag dunay mga sakay nga mag –island hopping nga mga turista.
Apan kagahapon sa buntag nahibulong kini nga mikalit lang og kurog ang propeller sa iyang pumpboat ug sa pagsusi pa niini usa ka tawo ang milutaw sa luyo ug diha nalang niya mahibaw-ing naligsan kini.
Si Pangatungan nahiagum og mga samad sa iyang walang kilid ug nabali ang walang tiil human maigo sa mahait nga propeller blades sa maong pumpboat ug daling gidala sa Mactan Doctors Hospital.
Samtang si Abrasada personal nga mitahan sa iyang kaugalingon ngadto sa kapolisan sa dakbayan sa Lapulapu ug misaad kini nga maoy moabaga sa gastohanan sa tambalanan sa biktima.
Hangtud ning pagsuwat sa balita anaa pa sa kritikal nga kahimtang si Pangatungan.