Gumikan sa kaguol sa kamatayon sa iyang inahan usa ka 26-anyos nga dalaga ang naghikog sa punoan sa Bayabas niadtong milabay’ng hapon didto sa barangay Dayhagon lungsod sa Medellin.
Ang naghikog giila sa kapulisan nga si Emily Ompoc, 26, nga nagpuyo sa nahisgutang lugar.
Sa gipahigayong imbestigasyon nila ni PO2 Rodelo Pilapil ug mga kaubanan sa Medellin Police Station mga alas 9:00 pasado sa gabii niadtong miaging adlaw nila giduaw ang lugar dihang wala gilayon ma-report ang insidente.
Ang naghikog nga si Emily nakit-an sa iyang amahan nga si Felix Ompoc, 58, uban sa ilang mga kaliwat nga nagbitay na sa punoan sa Bayabas nga naghigot sa iyang liog ginamit ang bagon.
Gidali unta kini nila sa pagdala sa Severo Verallo Memorial District Hospital sa dakbayan sa Bogo apan gideklarar kini sa mga mananambal nga dead-on-arrival.
Hinuon atol sa paghiling sa mga doctor sa patay’ng lawas sa naghikog way timailhan nga adunay foul play ang kamatayon sa dalaga.
Gikatahong sukad nga namatay iyang inahan niadtong milabay’ng semana ug kasamtangan pang gihaya diha sa ilang panimalay magul-anon na kaayo ang dalaga.