Gipaabot nga mubalik na sa iyang trabaho karong adlawa diha sa Cebu City Hall ang hepe sa Land Appraisal Division nga si Engracio Lumangtad.
Kini tungod kay natapos na ang duha ka buwan nga preventive suspension nga gipahamtang kaniya sugod niadtong Pebrero 26.
Gisuspenso si Lumangtad human masikop sa mga operatiba sa National Bureau of Investigation (NBI-7) pinaagi sa entrapment operation.
Kini dihang gipasanginlan sa usa ka Francisco Bontuyan sa barangay Talamban nga nangilkil kaniya og P50 mil bugti sa pag-release niini sa iyang tax declaration.
Lakip sa mga kaso nga gipasaka batok kang Lumangtad mao ang robbery-extortion, conduct unbecoming of a public official, ug kalapasan sa anti-graft and corrupt practices act.
Kini samtang ang Employee-Management Committee On Investigation (EMCOI) sa City Hall mipahigayon usab og linain nga imbestigasyon batok sa nahisgutang kawani.
Apan nasayran sa Banat News nga wala pa makapagawas ang EMCOI og resulta sa ilang gipahigayon nga imbestigasyon batok sa maong empleyado.
Tungod niini, mahimo nang makabalik sa trabaho si Lumangtad apan dili na hinoon sa naandan niyang gimbuhaton sa Land Appraisal Division.
Matud sa labaw sa City Assessor’s Office nga si Eustaquio Cesa, hangpon niya ang pagbalik ni Lumangtad sa iyang departamento apan kini iya nang idistino og laing trabaho.
Wala hinuon matino kung asa nga buhatan ibutang ni Cesa si Lumangtad, apan kini niklaro nga iyang pangitaan og pwesto ang nahisgutang kawani.
Bugtong na lang babag sa pagbalik ni Lumangtad diha sa City Hall mao si Mayor Tomas Osmeña nga maoy gihuwaman og kwarta nga gigamit pag-entrap sa maong empleyado.
Una nang gipadayag sa mayor nga dili siya makatugot nga magpabilin pa sa City Hall ang maong matang sa kawani.
Kini agi'g pagpadangat usab og mensahe sa tanang mga empleyado, nga siya seryoso sa tinguha paglimpyo sa City Hall gikan sa badlongong mga kawani.