Opisyal sa PNP gisukmag

Usa ka opisyal sa kapolisan sa dakbayan sa Talisay ang gisukmag  sa  usa ka hubog kinsa ilang gisikop tungod kay naghimo kini og kasamok uban sa iyang igsoon kagahapon sa kaadlawon diha sa Benito Beach sa  Barangay Poblacion, dakbayan sa Talisay.

Si Police Inspector Jaime Santillan, PO1 Aquiles Cabando ug PO1 Rafael Albero Jr. ang miresponde sa maong alarma.

Naaktohan sa maong mga police ang magsuong Allan ug Michael Delima nga nag-away ug nagkinulatahay.

Gidala nila ni Santillan ang magsuong Delima sa police station sa Poblacion aron husayon.  Apan samtang giimbestigar sa mga polis ang duha,   kalit lang nanukmag  si Allan sa mga polis ug ang kumo niini didto mitugpa sa dughan ni Santillan ug nanghagit usab kini og sukmagay ngadto sa mga polis nga misikop kanila.

Ang duha positibong nakainom og ilimnong makahubog base sa resulta sa liquor test kagahapon sa buntag.

Ang magsuong Delima nagtingkagol karon saTalisay police detention cell ug mag-atubang sa kasong “direct assault of an agent or person in authority ug obstruction of justice.