Nagdala'g granada sa videokihan nadakpan

Nagdala og granada sa sulod sa usa ka videokihan sa dalan Maximo Patalinjug, Pusok, dakbayan sa Lapulapu  nadakpan ug mag-atubang kini sa kaso nga ilegal nga paghupot og eksplosibong hinagiban.

Ang nadakpan giila ni SPO2 Nicanor Bacayo nga mao si Arnel Socobos Navarro, 24,  ulitawo nga taga Seaside,  Pajo sa maong dakbayan.

Matud pa ni Bacayo nga si Ricardo Navarro nga usa ka sakop sa Bantay  Bayan volunteer ug nagtrabaho sa  tapsilogan ug karaoke  bar nga nahimutang sa maong lugar maoy nakadakop kang Navarro.

Dugang pa niya  nga ang suspetsado  nakuhaan og apple type nga granada  ila kining pasakaan og duha ka mga kaso.

Naglakip sa maong duha ka kaso mao ang ilegal nga paghupot sa eksplosibo nga hinagiban ug election ban nga gipatuman sa Commission on election.

Si SPO2 Bacayo miingon nga gipakita sa suspetsado kang Navarro ang granada kay gitanyag nga ibaligya ngadto kaniya nga maoy hinungdan sa pagkasakmit ug gitahan ngadto kanila.