Giduso na ni Kongresista Benhur Salimbangon ang balaudnon nga magdugang og sala sa Regional Trial Court sa dakbayan sa Bogo.
Ang House Bill No. 2214 nga maoy mousab sa Batas Pambansa Blg. 129 nga gitawag og “Judiciary Reorganization Act of 1981” kon kini maaprobahan sa Kongreso.
Gitumbok ni Salimbangon ang batakang katungod sa matag Pilipino nga mao ang daling kasulbaran sa usa ka kaso.
Matud pa ni Salimbangon nga maangkon lang ang maong katungod kun daghang korte ang mohusay sa kaso.
Sa pagkakaron ang ikaupat nga distrito nga gilangkuban sa dakbayan sa Bogo ug mga lungsod sa Bantayan, Daanbantayan, Madridejos, Medellin, San Remegio, Sta. Fe, Tabogon ug Tabuelan, ang adunay usa ka RTC nga nagbase sa dakbayan sa Bogo.
Matud pa ni Salimbangon nga nagkadaghan na ang molupyo sa distrito ug dugangan pa sa pagkahimo na nga syudad sa Bogo.
Dugang pa niya nga ang pagbutang og dugang sala sa RTC makapagaan kini sa nagtapun-og na nga mga kaso nga anaa sa kasamtangang RTC.