Naligsan patay ang usa ka lalaki sa Ceres Bus human kini molabang sa pikas dalan sa miaging adlaw pasado alas 8 sa buntag diha sa El Pardo Boljoon Cebu.
Ang biktima giila sa kapolisan nga si Alex Gumera, 33, ug residente sa nahisgutang lugar.
Segun sa report nga nidangat sa Provincial Police usa ka Ceres Bus nagtangag sa plaka FVW- 529 gimaneho ni Roger Harap, 42, lumad nga taga Negros Occidental ang nakaligis sa biktima.
Nasayran nga si Harap gikan sa dakbayan sa Sugbu ug paingon sa Samboan apan pag-abot sa maong lugar ang biktima nga nagbarog sa daplin sa karsada kalit lang nilabang sa pikas dalan dihang duol na kaayo ang Ceres hinungdan nga nadasmagan ug nalatayan gyud sa ligid ang katunga sa lawas niini.
Sa pagka karun ila unang gitanggong sulod sa detention cell ang driver sa Ceres ug nagpaabot sa mga tagtungod gikan sa dakbayan kung unsay makab-ot nga kasabutan.—Rey B. Pasaporte