Dungan niini, giklaro ni Quisumbing nga usa ka isyu sa eleksiyon ang maong kontrobersiya ilabi na nga nagpakahilum ang iyang kaatbang nga si Kong. Nerissa Soon-Ruiz nga alalay ni Mandaue City Mayor Thadeo Ouano kinsa suspendido na gumikan sa maong kaso.
Atol sa niaging 888 News Forum sa Marco Polo Plaza Hotel, si Quisumbing miingon nga katungod sa publiko ang pagpangita og subay sa tanang proyekto sa gobyerno nga gikan sa buhis sa katawhan.
Giklaro ni Quisumbing nga dili siya usa ka tradisyonal nga politiko sanglit nahimo na nga hiyas sa ilang pamilya ang tinud-anay nga pagserbisyo ug pagtabang sa katawhan nga iyang gitawag og "pure service."
Ang isyu sa lampposts ang gigamit usab sa mga alalay ni Quisumbing nga gipanguluhan ni Konsehal Jonas Cortes batok sa iyang kaatbang sa pagka-mayor, Jonkie Ouano, nga anak ni Mayor Thadeo Ouano.
Si Quisumbing sakop sa Lakas Christian Muslim Democrats samtang si Ruiz sakop sa Kabalikat ng Malayang Pilipino nga parehong alalay ni Presidenti Gloria Macapagal Arroyo.
Tinguha ni Quisumbing nga mabalik ang pagsalig sa mga magpapatigayun sa ikaunom nga distrito nga gilangkuban sa mga dakbayan sa Mandaue ug Lapu-Lapu ug mga lungsod sa Cordova ug Consolacion.
Usa sa paagi mao ang paglimpyo sa isyu sa graft and corruption sama sa kontrobersiya sa decorative lampposts ug kaso sa mega shabu laboratory nga nadiskubrehan sa dakbayan sa Mandaue niadtong tuig 2004.