Naghikog tungod sa cancer

Usa ka 45 anyos nga lalaki ang naghikog pinaagi sa paghigot og pisi ngadto sa iyang liog ug gibanting sa kisami sulod sa iyang kuwarto tungod sa sakit nga cancer.

Ang maong insidente nahitabo sa miaging adlaw didto sa Cambuhawi, Balamban, Cebu

Nadiskubrihan nalang sa mga anak pasado alas 10 sa buntag ang patay'ng lawas sa ilang amahan nga si Godofredo Goc-ong Atamosa, nagpuyo sa nahisgutang dapit.

Base sa taho sa kapolisan nga midangat sa Cebu Provincial Police Office nasayran nga ang biktima nakit-an nagbitay na sulod sa kuwarto ug wala na kini mag ginhawa.

Ang pamilya ni Atamosa mibutyag sa mga polis nga ang ilang amahan naghambin sa sakit nga cancer sulod sa dugay nang panahon.

Gani ang kapolisan nakakuha og suicide note diin nangayog pasaylo ngadto sa iyang pamilya si Atamosa gumikan sa iyang gibuhat kay dili siya gusto nga maproblema ang iyang pamilya kaniya.

Ang patay'ng lawas ni Atamosa gipailawom sa autopsy sa kapolisan aron masuta nga walay, foul play ang iyang kamatayon.