10 ka police station wa manakop og pabuto

Pakyas pagpatuman ang napulo sa onse ka mga police station dinhi sa dakbayan sa Sugbo sa pagpanakop niadtong mga nagbaligya og mga ilegal nga pabuto sa ilang hurisdiksyon, bisan paman sa direktiba nga giluwatan ni Cebu City Director Supt Melvin Gayotin sa nagsingabot nga Pasko.

Gumikan niini gipadad-an nag sugod kagahapong adlawa ang mga station commanders sa napulo sa onse ka police station dinhi sa dakbayan kun nganong walay nasumiter nga report bahin sa kampanya batok sa mga ilegal nga pabuto bisan kun wala silay nadakpan.

Gipahibalo ni Gayotin nga bugtong ang Punta Princesa Police Station ang nakasumiter human sila makadakop og mga namaligya og pabuto diha sa dalan Salvador, Labangon niadtong milabay'ng Pasko.

Matud ni Gayotin iya na usab pahimangnuan ang tanang hepe sa mga police station nga monitoron ang namaligya og mga pabuto sa daplin sa dalan ug dakpon kun dunay baligya nga dagkong pabuto ug ingon man walay permit nga ikapakita.

Gisultian na usab ni Gayotin ang mga kapitan nga ilhon nila ang namaligya og pabuto sa higayon kun dunay mamaligya sa ilang lugar ug mo-report gilayon ngadto kanila aron maaksiyonan sa kapolisan.

Mapasalamaton si Gayotin sa publiko nga na-edukar na ug dili na mogamit og mga dagkong pabuto, hinungdan nga miminos karon ang nabuthan niadtong milabay'ng Pasko.

Giawhag niya ang katawhan nga mo-text dayon sa kapolisan kun dunay makit-an nga namaligya sa mga dagkong pabuto sama sa super dynamite, super lolo, whistle bomb ug uban pa aron ilang masusi kun kini gitugotan ba nga sila makabaligya.