Gipusil sa tampihak napalgang patay diha sa Duljo-Fatima

Usa ka batan-on ang gidul-itag pusil sa tampihak sa iyang ulo ang nakit-ang nagbuy-od ug wala nay kinabuhi diha sa sitio Black Cat sa barangay Duljo-Fatima ning dakbayan kagahapon sa kaadlawon.

Ang biktima giilang si Jericho Panuyla,33, taga Sta.Teresa Village sa San Isidro, Talisay kinsa kasamtangang naglakaw sa maong dapit dihang kalit nga gidul-itan sa wala pa mailhing suspek.

Kagahapon sa imbestigasyon sa Homicide Section walay nakaila sa biktima diha sa maong lugar apan walay makatumbok kung nag-unsa kini sa maong dapit.

Nailhan nalang kini dihang giadto sa mga kabanay diha sa punerarya sa San Fernando ang patay'ng lawas niini, apan bisan sila wala masayod kung giunsa pagkahitabo nga napusilan ang biktima.

Gituohang dunay kauban ang biktima niadtong tungora apan dihang napusilan kini dali usab nga nakadagan apan wala pa makakumpirmar ang kapolisan niini.

Ang biktima nakaangkon og usa ka samad pinusilan sa tuong tampihak sa ulo nga nakaingon sa hinanali niining kamatayon.

Buto lang sa armas ang nadunggan sa mga tawo diha sa maong lugar apan walay nakatug-an sa pagkahitabo, sila na usab ang mipahibalo sa kapolisan kabahin sa insidente.

Gisusi na karon sa kapolisan ang tanang anggulo lakip ang anggulo sa personal ug posibleng kalambigitan sa drogas sa maong kaso.