15-anyos gipamabdosan sa amahan

Usa ka amahan gibalhog sa bilanggoan human gireklamo sa iyang 15-anyos nga anak babaye nga maoy miunay paglugos diha sa ilang panimalay samtang wala ang iyang inahan.

Kini nahitabo niadtong Abril 28 niining tuiga alas 7 sa gabii sa usa ka barangay sa Poro, isla sa Camotes.

Apan namatikdan sa inahan nga wala na tunghai sa binulan hinungdan nga gipa pregnancy test sa Poro Health Center ni Dra. Mabel Huete ug positibo nga mabdos duha ka bulan ang biktima.

Samtang ang amahan nga miunay paglugos sa biktima nga si Buloy (tinuod nga ngalan gipugngan) 47 anyos, utility worker sa electric cooperative sa isla ug lumad nga taga Mabinay, Negros Oriental ug kasamtangang nagpuyo sa maong lugar human kini maminyo.

Si Inday, tinun-an sa 4th tear high school sa Camotes Visayan Institute ug graduating student karong umaabot Marso 2007.

Si Sr. Insp. Armando Garciano, hepe sa Poro Police, nga nahinabi sa Banat News nagkanayon nga niadtong Lunes nahibulong ang inahan sa biktima nga midako na ang bat-ang ni Inday ug medyo dunay timailhan sa babaye nga kini mabdos.

Base sa resulta niadtong Lunes human sa pregnancy test ni Huete nasuta nga mabdos ang biktima.

Matud ni Garciano nga mitug-an ang biktima nga gilugos siya sa iyang amahan niadtong Abril.

Dugang pa ni Garciano nga ilang giimbitar ang suspek sa ilang buhatan, apan wala magmakuli ang suspek sa pagkuyog ngadto kanila.

"Niangkon mani siya kay gisukitsukit man sa mayor diri ganihang buntag, iya gyud kuno nabuhat ngadto sa iyang anak" sumala pa ni Garciano.

Ang kapolisan nagpaabot nalang sa resulta sa medical exam aron ilang kapasakaan og kasong pagpanglugos ngadto sa piskaliya ang suspetsado.