1 gipusil, 2 giluba sa Danao

Usa ang gipusil samtang duha ang gipangdunggab nga anaa sa kritikal nga kondisyon sa managlahing dapit didto sa Danao sa milabay'ng adlaw.

Didto sa Binaliw, dakbayan sa Danao mga alas 12:15 sa kaudtohon sa milabay'ng adlaw duha ka managhigala ang gipangdunggab samtang nagtan-aw og basketball sa maong dapit.

Ang biktima mao si Jeffrey Roble Blasco, 27, minyo ug Jimenez Capol Perez, 36, minyo nga mga lumolupyo sa maong dapit.

Ang gitumbok nga maoy responsable sa krimen mao si Ulysis Cuizon nga silingan ra sa mga biktima.

Sa imbestigasyon ni SPO3 Ramerito Ramonada sa Danao Police Station nasuta nga daan na nga adunay pagdumot si Ulysis nila ni Jeffrey ug Jimenez. Sa dihang nakita kini nga nagtan-aw og basketball wala maglangay si Ulysis ngadto sa duha dayong dunggab gamit ang usa ka batangas.

Si Jeffrey nahiagum og samad sa iyang tiyan, samtang si Jimenez sa iyang likod ug dali nga gidala sa Danao District Hospital apan giduso usab kini ngadto sa Vicente Sotto Memorial Medical Center nga anaa sa kritikal nga kondisyon.

Human sa maong insidente si Ulysis misibat samtang padayon pa ang gihimong pagpangita sa kapolisan sa Danao ngadto kaniya.

Didto usab sa sitio Ylaya, Guinakot dakbayan sa Danao sa susamang adlaw usa ka batan-on ang gipusil samtang kuyog sa iyang mga higala mga alas 9:50 sa gabii.

Ang biktima mao si Jason Bravo, 15, ulitawo nga lumad sa Duterte dalan Suba dakbayan sa Danao.

Ang suspetsado naila lamang sa ngan nga "Salem" usa gihapon ka batan-on nga lumolupyo sa Brgy. Ylaya dakbayan sa Danao.

Sa imbestigasyon nga gihimo ni SPO1 Alan Muñoz sa Danao Police Station nasayran nga si Jason kuyog ang mga higala niini samtang naglakaw sa maong dapit kalit lang nga mitunga si Salem ug namusil.

Sa maong insidente si Jason naigo sa bala sa wala pa mailhing armas nga gamit ni Salem sa pagpamusil kanila.

Nahiagom og samad pinusilan si Jason sa iyang likod nga gidali og dala sa Danao District Hospital ug giduso sa VSMVC ug anaa sa kritikal nga kondisyon.