Matud sa konsehal dihang nahinabi sa Banat News nakadawat sila og report niadtong milabay'ng mga semana nga nasigpatan didto sa Norte nga bahin sa lalawigan sa Sugbo si Aves.
Niadto lang niaging mga adlaw laing report nga ilang nadawat nga atua na usab sa siyudad sa Talisay si Aves apan wala kini maabti.
Gibutyag sa Regional President sa Akrho, Richard Buscayno nga gituohan nilang nilarga didto sa Mindanao si Aves human gipatuman ang reward system sa City Hall diin si Aves maoy nag-una niini nga dunay ganti nga P150 mil sa makatug-an sa iyang nahimutangan ug karong bag-o gidoble ni mayor Tomas Osmeña ang maong ganti ngadto sa P300 mil aron mapadali ang pagsikop niini.
Apan dili uyon niini ang konsehal tungod kay matud niya ania gihapon sa Sugbo si Aves ug duna lay pipila ka mga sakop sa maong fraternity ang mitabang og tabon kaniya aron dili madakpan.
Gihangop hinoon sa konsehal ang pamahayag ni Buscayno nga nipasalig nga motabang sa pagpangita og paagi aron masikop na si Aves ug atubangon niini ang mga kasong iyang gi-atubang.
Nasayran nga dunay dili momenos walo ka mga kasong murder ang gi-atubang ni Aves.