ROTC program pakusgan - AFP

Sa tuyo nga mapangusgan ang enrollment sa Reserve Officers Training Corps sa kolehiyo usa ka dakong kalihukan ug kausaban sa mga programa ang ipatuman sa Army Reserve Command (ARESCOM) sa Armed Forces of the Philippines.

Si Col. Guillermo Luyao, ang Commander sa 7th Regional Community Defense Group sa pakighinabi sa Banat News mibutyag nga sa pagkakaron sa bag-ong Akta Republika 9163 nga nagtugot sa mga tinun-an nga makapili og sudlan kun ROTC ba o Community Welfare Service(CWS).

Miangkon si Luyao nga mikunhod gyud ang gidaghanon karon alang sa reservist sa militar.

Nunot niini ang ARESCOM milusad og mga bag-ong programa nga maghimo sa ROTC nga mas "enjoyable" ug dili lang pulos parade drills and ceremonies diha sa field.

"This is our advocacy to encourage the youth especially the first year college students to enroll ROTC , we have new programs, to make ROTC more interesting and enjoyable, dili lang pulos drills sa field to make it more attractive to our new college students," sumala pang Luyao.

Ang usa ka ROTC reservist mahimong tawgon panahon nga gikinahanglan ang ilang serbisyo militar panahon sa gubat aron depensahan ang nasud ug ingon man panahon sa kalinaw kun gikinahanglan sama sa mga trahedya ug uban pa.

Karong Marso 2 ngadto sa 4 ilusad ang 1st Army ROTC Corps Commanders National Convention nga tambungan og 183 ka mga kanhi Corps Commanders sa kolehiyo alang sa dugang paghingusog sa kampanya aron pag-aghat sa kabataan sa pag-enroll sa ROTC.

Samtang ang kasamtangan Ready Reserved Battalion karon sa ARESCOM nga ilawom usab sa Akta Republika 7777 dunay ipahigayong Evening Parade diha sa parade grounds sa Central Command karong Marso 3 diin gilangkuban kini sa mga propesyunal, aktibong reservist sa Army apan gipiling magsibilyan.

Samtang gipahibalo ni Luyao nga padayon pa ang pagdawat sa enlistment alang sa mga reservist diha sa iyang buhatan aron malakip sa talaan sa mga aktibong reservist sa AFP.