Nanulis sa lotto outlet nasikop sa Danao

Suspek sa pagpanulis sa usa ka lotto outlet sa dakbayan sa Danao nga giingong kauban ni Rey Torres ug Danny Limotan nasikop dihang nasigpatang mitan-aw duol sa gipahigayong konsiyerto alang sa pormal nga pagbukas sa 23rd South East Asian Games sa dakbayan sa Danao niadtong Biyernes sa gabii.

Wala na makaugpo si Aladin Jaime, 22, molupyo sa barangay Maslog, dakbayan sa Danao human alirungi sa grupo nila ni SPO2 Roberto Canencia ug PO2 Francis Allen Villamor diha sa usa ka gamayng imnanan sa Plaza Rizal barangay Poblacion sa nahisgutang dakbayan.

Usa ka police asset nga naniid sa palibot maoy nakaila kang Jaime nga nag-inom diha sa maong dapit ug daling mitawag kang Villamor hinungdan sa ilang pagsusi.

Sumala pa ni Villamor sa Banat News nga daghang mga polis diha duol sa gikahimutangan ni Jaime nga nagbantay sa kalingawan niadtong tungura apan walay nakamatikod sa suspek.

"Naay nakatawag nako nga atong asset nga nakaila kaniya, kay duna man na siyay litrato dinhi sa amo," asoy pang Villamor.

Si Jaime maoy usa sa gitumbok nga tulo ka tulisang mitulis sa lotto outlet nga gipanag-iya ni Lovelle Mahinay diha sa barangay Sabang sa naasoyng dakbayan niadtong bulan sa Oktobre diin nadala sa mga suspek ang P300,000 nga tseke ug P30,000 nga cash.

Giaresto si Jaime pinasikad sa arrest warrant nga giluwatan ni RTC branch 25 Judge Silva Aguerre Paderangga nga dunay P100,000 nga girekomendar nga piyansa.

Kini human ang mga suspek naila sa mga testigos nga mga kagrupo nila ni Torres nga sila si Junard Saladaga ug Renato Hermosilla gitumbok nga maoy mitulis kanila