Kapitan gireklamo sa tresurera

Barangay treasurer sa Jaclupan miduso og reklamo ngadto sa buhatan sa kapolisan sa Talisay sa milabayng adlaw batok sa kapitan sa ilang barangay tungod sa pag-abuso sa gahom niini.

Si Elsa Billones, 46 anyos, mipasangil ngadto ni Placido Labajo nga mi-harass kaniya.

Matud pa ni Billones nga gusto ni Labajo nga i-turn over niya ang mga dokumento nga gisalig kaniya tungod kay aduna nay mopuli niya sa iyang serbisyo.

Apan nagdumili si Billones pagsunod sa mando ni Labajo tungod kay wala siyay nadawat nga termination order.

Tungod sa pagdumili ni Billones gikuha ni Labajo gikan niya ang yawe sa iyang locker ug giablihan kini sa kapitan ug gipanguha ang mga records nga sulod niini.

Si Billones mipasangil usab nga buot ilogon ni Labajo ang iyang bag tungod kay gusto tan-awon sa kapitan kun unsay sulod niini.

Tungod sa kasuko ni Labjao ngadto ni Billones gilabay niini ang baso nga iyang giimnan ngadto sa bintana diin ang mga tawo didto sa ubos sa barangay hall nakugang tungod sa pagkahagsa sa baso ug nabuak.

Ang Banat News misulay apan napakyas sa pagkuha og pamahayag ni Labajo tungod kay wala may linya sa telepono ang barangay hall sa Jaclupan.

Si Association of Barangay Captain (ABC) president Osmundo Manreal nagkanayon nga kinahanglan nga moduso og pormal nga reklamo ang biktima ngadto sa iyang buhatan aron ma-imbestigar ug matagaan niya og aksiyon ang insidente.