Nahitabo kini alas 12 pasado ang takna sa miaging tungang gabii sa dalan Suico sa barangay Tabok, siyudad sa Mandaue.
Ang biktima mao si German Catago, minyo nga taga Lower Tabok sa nahisgotang dakbayan.
Sa imbestigasyon nila ni SPO1 Silverio Aparicio sa Presinto 3 sa Basak Police Station sa maong siyudad nahibaw-an nga gikan sa ilang panimalay ang biktima ug miadto kini sa tindahan nga nahimutang sa unahan sa maong lugar.
Gisugat sa duha ka tawo nga gikan sa karaokehan ang biktima ug walay igong hinungdan kalit lamang nga gisukmag sa makadaghang higayon.
Daw kahoy nga nahagba sa yuta ang biktima ug ang ulo mitaguktok ngadto sa sementado nga karsada nga maoy hinungdan sa dakong kadaut nga naangkon niini.
Dali nga gihatod ang biktima sa Mandaue City Hospital apan si Dr. Pelote Sagala sa maong tambalanan mideklarar nga patay na nga nahidangat kanila ang biktima.