‘One strike policy’ ipapatupad na rin ng MMDA sa mga tauhan
MANILA, Philippines - Mahigpit na ipatutupad ng Metropolitan Manila Development Authority (MMDA) ang ‘one strike policy’ laban sa kanilang mga kawaning sangkot sa mga katiwalian.
Ayon kay MMDA General Manager Tim Orbos, ang lahat aniyang kawani ng MMDA, mapa-permanent man ito, casual o job order ay papatawan ng preventive suspension kapag napatunayang sangkot sa katiwalian.
Kung saan ang ‘one strike policy’ na ipatutupad ng MMDA laban sa mga tiwaling kawani ay hindi na bibigyan ng pangalawa pang pagkakataong makapagserbisyo sa naturang ahensiya kapag guilty ang mga ito sa akusasyon laban sa kanila.
Kabilang sa polisiyang mahigpit na ipatutupad ng MMDA ay ang pag-obliga sa mga kawaning magsuot ng ID sa oras ng kanilang trabaho.
Samantala, ang mga kawani ng tow truck na accredited sa MMDA ay dapat din aniyang sumunod sa mga patakarang pinatutupad ng ahensiya, kabilang dito ang pagsusuot ng uniporme.
Papatawan din aniya ng parusa ang mga ito kapag may naganap na pag-abuso sa mga hinahatak nilang mga sasakyan.
- Latest