Gisanta
CEBU, Philippines - Mikadlit og 34 puntos si Karl-Anthony Towns ug milangkat og 12 ka rebounds alang sa Minnesota Timberwolves nga mipakgang sa Portland TrailBlazers sa kulbahinam nilang duwa, 110-109 sa NBA kagahapon didto sa Target Center sa Minneapolis, Minnesota.
Duna pa unta’y tsansa ang TrailBlazers nga modaog, apan wala masulod ang libreng itsa ni Damian Lillard dayon kapupos sa oras nga nagputol sa ilang unom ka sunod-sunod nga daog.
Bitbit ang 38-39 record, ang TrailBlazers nagkumpayot karon sa ikawalo ug katapusang luna sa playoffs sa Western Conference.
Naglabaw sila og 12 puntos sa ikatulong kuwarter sa wala pa nagmangtas ang Wolves aron pagpatikalbong sa TrailBlazers.
Nakalabaw og balik ang Blazers human milusad og 7-0 run, apan dali nga nakabawi ang Wolves aron paglabaw og singko puntos human sa itsada ni Towns sa nahabilin nga 57.3 segundos.
Gitak-op ni Towns ang mabungahon niyang adlaw pinaagi sa usa ka two-handed dunk nga napaabante kanila og balik, 110-106 sa nahibiling 35 segundos. Miabag kaniya si Andrew Wiggins nga mihipos og 29 puntos.
Bisan tuod og wala na sila’y tsansa nga makasud sa playoffs, si Towns napuno gihapon og paglaum ug mapasigarbuhon sa ilang performance karon nga season.
“I think we’re building something,” matud pa ni Towns. “Regardless of what our record is, we’ve got to go out there and play basketball the right way. Every game, every second, every practice, every workout is valuable to building a championship team and that’s how we need to look at it.” (BANAT NEWS)
- Latest
