Nisukol sa polis patay
CEBU, Philippines - Patay ang usa ka gipasanginlang drug pusher nga giingong kalit namusil sa mga polis atol sa gihimong buy-bust operation diha sa Barangay Cogon, Lungsod sa Cordova sa miaging udto.
Si Senior Police Officer One Laurencio Wagwag sa Cordova Police Station miila sa namatay nga mao si Ricardo Ando, nagpuyo sa maong dapit.
Matud pa ni Wagwag ang ilang hepe nga si Senior Inspector Clemente Ceralde maoy nangulo sa buy-bust operation base sa impormasyong nadawat nga namaligya og drugas ang suspek sa maong dapit.
Usa ka polis ang nagsilbing poseur buyer nga nipalit og usa ka gamay nga paketeng shabu diha sa suspek bugti sa P500 nga marked money.
Sa pagtunol sa poseur buyer sa P500 nga salapi ug pagtunol sa suspek sa ginadiling drugas dali siyang gidakop.
Apan gikatahong mikisikisi kini ug midagan dayong bunot og armas ug namusil ngadto sa direksyon sa mga polis.
Ang mga polis mibawos sa pagpusil sa maong suspetsado hinungdan sa iyang pagkahagba ngadto sa yuta ug namatay.
Pito ka gagmay nga putos nga shabu, usa ka kalibre .45 pistola nga puno og bala ug usa ka basiyo sa bala sa .9mm ang nakuha diha sa crime scene. (BANAT NEWS)
- Latest