Back-2-back title sa Arellano tracksters
MANILA, Philippines - Nagwagi si Joe Marie Arevalo sa 1500-m run para muling masungkit ng Arellano University ang ikalawang sunod na titulo sa 92nd NCAA Track and Field Championship sa Philsports track oval ng Pasig City.
Sa panalo ni Arevalo, dinomina ng Arellano Chiefs ang naturang event matapos makuha ng kanyang teammates na si Immanuel Camino ang silver habang si Christian Traje naman sa bronze medal.
Nagtala ng kabuuang 740 puntos ang Legarda-based team upang talunin ang Mapua at College of St. Benilde sa track and field competition.
Ang Mapua ay mayroon lamang 537.5 puntos para sa ikalawang puwesto at 407.5 naman sa St. Benilde Blazers para sa ikatlong upuan.
Ang dating four-peat champion Jose Rizal University ay nakakuha lamang ng 334 puntos para sa ika-apat na puwesto at panlima nama ang University of Perpetual Help sa 311.5 puntos.
Ang pambato ng Perpetual Help na si Francis Medina naman ang nahirang na Most Bemedalled Athlete sa kanyang panalo sa 400-m, 110-m hurdles, 400-m hurdles at 4x400-m relay. Nabura rin ni Medina ang dating meet record sa 110-m at 400-m hurdles.
Sa juniors' division, nasikwat din ng Emilio Aguinaldo ang ikalawang sunod na titulo sa kanilang 641.5 points habang sumegunda ang San Beda sa 578 points at ikatlo ang San Sebastian na may 469 points.
Si Veruel Verdadero ng Brigadiers ang Most Outstanding Athlete mula sa kanyang panalo sa sa 100-m, 200-m, 400-m, 4x100-m at 4x100-m. Naitala rin ni Verdadero ang bagong meet record sa 400-m at 4x100-m.
- Latest
