CPDRC gi-raid sa PDEA ug AFP

CEBU, Philippines - Mga sakop sa Philippine Drug Enforcement Agency (PDEA) nga giabagan sa mga sundalo mihimo’g kinalit nga pagronda sa Cebu Provincial Detention and Rehabilitation Center (CPDRC) kagahapon sa kaadlawon ug nasakmit nila gikan sa mga binilanggo ang daghang butang kontrabando.

Atol sa greyhound operation nasakmit ang 19 ka paketeng may sulod nga gituohang shabu nga mobalor og P30 mil, usa ka plastik bag nga may sulod nga marijuana, drug paraphernalia, laptop, daghang cellphone ug mga electronic device, ug kuwarta nga kapin sa P92 mil.

Duna pa’y mga bank passbook, money transfer ug mga resibo sa banko.

Usa sa mga nakuhaan og cellphone mao ang gitumbok nga numero unong drug personality sa Sugbo nga si Alvaro Alvaro alyas Barok.

Matud ni PDEA-7 regional director Yogi Filemon Ruiz nga haguka gyud kaayo ang pagbantay sa bilanggoan sa probinsiya. Si Ruiz miingon nga apil sa ilang tahas mao ang paglimpyo sa bilanggoan sa ilegal nga drugas.

Dugang ni Ruiz nga nakabantay sila nga may bag-ong trusted man ni Alvaro Alvaro ug tungod niini ila kining susihon aron ilang mailhan. Ang PDEA moduso og report ngadto kang Gobernador Hilario Davide III kabahin sa gihimo nila nga greyhound operation.

 Sa wala pa siksika sa mga militar ug ahente sa PDEA ang mga silda, ang mga binilanggo gipagawas sa tagsa-tagsa nila ka selda nga gipahukas nang daan ang ilang mga sinena ug didto gipalingkod sa hawanan sa bilanggoan ang mga walay sapot nga piniriso.

Ang CPDRC gibutangan na og signal jammer aron nga mapugngan ang paggamit og cellphone sa mga binilanggo. Si Davide gusto nga magpakisayod kang warden Gil Macato kun nganong may daghan pa nga kontrabando nga nakuha sulod sa bilanggoan.

Nasayran nga wala si Macato sa bilanggoan diha nga gipahigayon ang greyhound operation kagahapon sa kaadlawon. Nagplano karon ang gobernador nga relibohan ang pipila ka guwardiya nga posibleng maoy kakonsabo sa pagpasulod sa mga kontrabando sa CPDRC.

Daghan ang nagtuo nga ang mga guwardiya sa bilanggoan mao ra usab ang nagpayuhot sa mga butang kontrabando, sama sa cellphones, laptop ug uban pa nga mga ilegal nga butang, bugti sa bayad ngadto kanila.

Gibutyag ni Davide nga siya maoy mihangyo sa PDEA kaniadtong miaging buwan nga mopahigayon og kinalit nga greyhound operation kay kanunay siya nga nakadawat og mga text messages nga nagpahibalo nga padayon ang pagsulod sa mga kontrabando sa CPDRC.

“I’ve been receiving text messages from anonymous person telling me nga naay drugas diha, nga involve ang prison guards. So one greyhound will disclose kun unsa gyud, so naa gyud diay,” matud ni Davide. Le Phyllis F. Antojado, Rowena D. Capistrano (BANAT NEWS)