Killers sa abogada kuhaon ‘dead or alive’

CEBU, Philippines - “Dead or alive.” Kini maoy mando sa  director sa Police Regional Office-7, Chief Supt. Noli Taliño aron pangitaon ang suspetsado sa pagpatay sa abogada sa Tagbilaran City sa Bohol sa miaging semana.

Si Atty. Mia Manuelita Mascariñas-Green ang gipusil sa mga lalaking nagsakay og motorsiklo samtang sakay sa iyang awto kauban iyang tulo ka mga anak ug katabang diha sa Purok 2, Sitio Lanao, Brgy. Dao, Tagbilaran City, niadtong Pebrero 15.

Ang Bohol Provincial Police Office una na nga miila sa suspetsado nga si Romarico Benigi-an ug Lloyd Lancer Gonzaga. Sila si Benigi-an ug Gonzaga maoy subject sa search warrant nga gisilbi diha sa Purok 7, Brgy. Tawala, Panglao apan wala ang duha sa pag-abot sa kapulisan niadtong Pebrero 17.

Sa gipuy-an sa mga suspetsado nakuha sa mga polis ang mga armas, bala ug mga pakete sa gituohang shabu.

Si Taliño miingon nga kung dili masikop ang duha ipasaka gihapon sa kapulisan ang kaso ug mimando kini sa iyang mga sakop gamiton ang pwersa kun mosukol ang duha.

Adunay P600 mil nga reward money alang sa mga makahatag og impormasyon sa gitagoan sa mga suspetsado.

Samtang ang Sugbuanong abogado nga si Inocencio dela Cerna maoy mopuli sa gihuptang kaso ni Green human midangop kaniya ang kliyente sa abogada human sa pagpatay.

Giangkon ni Dela Cerna nga delikado ang mao nga kaso  apan isip abogado wala niya kini panumbalinga kay mao kini ilang trabaho.

Ang kliyente sa gipatay nga abogada nga si Conrada Otero Blomquist, nanawagan usab og hustisya ngadto kang Presidente Rodrigo Duterte.

Siya mipasangil nga salapi ang rason kun nganong gipapatay sa iyang umagad nga si Gonzaga ang abogada. Matud niya gustong angkunon ni Gonzaga ang iyang mga bahandi sama sa hotel, sakyanan ug ang iyang panimalay.

Gitug-an niini nga gitawagan pa siya ni Gonzaga sa wala pa mahitabo ang pagpatay kang Green ug gipahibalo nga buk-on niini ang ulo sa abogada ug ipakapin pa siya niini.

Matud pang Blomquist nasuko si Gonzaga kang Green human nga milampos kini sa korte aron mabawi ang hotel pabor kaniya.  Gitug-an ni Blomquist ang iyang mga kabanay nabalaka karon sa iyang seguridad.

Nasayran nga napriso kaniadto si Gonzaga tungod sa kasong illegal possession of firearms ug pagpayuhot og ginadiling drugas apan kini nakapiyansa. Jojo Ugdol ug Rowena Capistrano (BANAT NEWS)