Lancers, Warriors magtiwas
CEBU, Philippines - Ang University of the Visayas (UV) Green Lancers mosuway na sab og tiwas sa serye, samtang ang University of San Carlos (USC) Warriors nanghinaut nga makapuwersa og rubbermatch sa ilang panag-abot alang sa Game 4 sa best-of-five 16th Cebu Schools Athletic Foundation, Inc. collegiate basketball finals karong adlawa diha sa Cebu Coliseum.
Magtige sila sa alas-5:30 sa hapon.
Human miposte og solidong 2-0 nga bentaha, ang Lancers nanginahanglan na lang og usa ka daog aron angkunon og balik ang titulo nga katapusan nilang natilawan tulo ka tuig ang milabay, apan gibabagan pa sila sa Warriors sa maong tinguha human kini midaog sa Game-3 sa iskor nga 56-52.
“I have to take my hats off for my boys. They played with a heart,” matud pa ni USC coach Rommel Rasmo.
“I hope we will be able to carry that momentum into our next game. It’s another task game for us, but let’s just wait and see what will happen next. As what I’ve said earlier, we will just play our game and live with the result.”
Sa iyang bahin, si UV coach Gary Cortes mapaubsanong miangkon nga kulang gyud sa pamatay nga determinasyon ang iyang mga sakop niadtong higayona hinungdan nga nawani sila sa madasigon nga Warriors.
“My players lacked killer instinct in that particular game. But I also have to credit to USC. I knew beforehand that they are capable of fighting back. We just have to give it another try and hopefully get the job done,” dason pa ni UV coach Gary Cortes.
Aron ila nang matapos ang serye sa hingpit, ang Lancers maglaum gihapon nilang Liberian import Bassieru Sackor, Rey Suerte, Josue Segumpan, Monic Soliva, Jerome Napao ug Alfred Codilla.
Itugyan sab ni Cortes ang iyang pagsalig nilang Tristan Albina, Jayson Balabag Michael Macion ug Sheldon Gahi.
Samtang ang Warriors nanghinaut nga makaangkon og maayong duwa gikan nilang Scoty Ntumba, Gio Laguyo, Conrad Catapusan, Ian Tagapan, Kevin Oleodo, Victor Rabat, Clint Muñez, Malcolm Tan, Dolan Adlawan ug Lucky Ecarma sa tinguha nga malugwayan pa ang serye. (BANAT NEWS)
- Latest
