VP Robredo mibalibad pagtunga sa Sinulog
CEBU, Philippines - Gibutyag ni Cebu City Mayor Tomas Osmeña nga nagkita ug nagkuyog sila ni Vice President Leni Robredo sa Cebu City Operation Second Chance Center atol sa pagbisita sa nauwahi sa Sugbo niadtong Enero 14, adlaw’ng Sabado.
Nasuta nga adunay taho nga migawas nga matud pa wala matagad ang bise presidente atol sa Sinulog apan nasayran nga wala kini mitambong sa maong kalihukan niadtong Enero 15 kay nibalik ra usab kini dayon sa kaulohan.
Matud ni Mayor Osmeña adunay schedule nga biyahe si Robredo apan wala kini kalabutan sa Sinulog. Gani, iya pang giimbitar ang bise presidente nga muadto sa grandstand sa Cebu City Sports Complex ug mo-wave sa mga Sugbuanon apan si Robredo maoy mibalibad kay basin og magtuo ang katawhan nga namulitika siya.
Alang ni Osmeña kay anaa naman unta kini sa Sugbo mas maayo nga motimbaya kini sa mga Sugbuanon.
Dugang sa mayor nga ang staff ni Robredo nasayod nga usa ka dakung kalihukan ang Sinulog ug dili kini ang insaktong panahon aron siya mopatim-aw kay basin og lainon og sabot sa katawhan ang kalit niyang pagbutho sa kalihukan.
“She’s schedule a trip but it has nothing to do with the Sinulog. I told her, you want to go to the grandstand, I think you should go and wave and she said no because people might think I’m politicizing”, matud pa ni Mayor Osmeña.
Kahinumduman nga sa pagbisita ni Robredo sa mga binilanggo, gipasalig niini nga ang tanan nilang yangungo sama sa pagkalangay sa ilang kaso, kakuwang og gamit sa prisohan, iyang ipaabot sa Korte Suprema aron usab mahatagan og solusyon ang ilang giatubang nga suliran. Decemay P. Padilla (BANAT NEWS)
- Latest
