Thunder sadsad sa Timberwolves
Iniwas ni Jimmy Butler ng Timberwolves ang kanyang tira sa tangkang supalpal ni Steven Adams ng Thunder.
MINNEAPOLIS-- Nagposte si Jimmy Butler ng 26 points, 7 rebounds at 8 assists para banderahan ang Minnesota Timberwolves sa 104-88 paggiba sa Oklahoma City Thunder.
Nagdagdag si Andrew Wiggins ng 19 points habang humakot si Karl-Anthony Towns ng 18 points at 12 rebounds para sa Minnesota, umarangkada sa second half para sa kanilang ikatlong sunod na home win at pang-10 sa kanilang huling 13 laban.
Naglista naman si Russell Westbrook ng 38 points at 10 rebounds, ngunit nag-ambag lamang sina Carmelo Anthony at Paul George ng 15 at 13 points, ayon sa pagkakasunod, para sa Oklahoma City.
Ito ang pang-limang kabiguan ng Thunder sa huli nilang pitong laro.
Sa Oakland, hinirang si Kevin Durant bilang ikalawang pinakamabilis na player sa NBA history na napasama sa 20,000-point plateau.
Ngunit sinapawan siya ni Lou Williams na naglista ng career-high na 50 points at pamunuan ang Los Angeles Clippers sa 125-106 panalo laban sa Golden State Warriors.
Humugot si Williams ng 13 points sa first half, ngunit sa third quarter ay humataw siya ng 27 points para sa highest-scoring period ng isang player ngayong season, ayon sa ESPN Stats & Info.
Tinapos ng Clippers ang kanilang 12-game losing slump laban sa kanilang Pacific Division rivals.
Nauna nang naipatalo ng Los Angeles ang 21 sa kanilang huling 23 laro sa Oracle Arena.
Tumapos naman si Durant na may 40 points mula sa 14-of-18 fieldgoal shooting, kasama ang 6-of-7 clip sa three-point line, para samahan sina LeBron James, Kobe Bryant, Michael Jordan at Wilt Chamberlain bilang tanging mga players na naglista ng 20,000 points bago maging 30-anyos.
- Latest
