Capacio, Altamirano kasama sa pagpipilian ng La Salle
MANILA, Philippines — Sa paglisan ni Aldin Ayo, bukas ang pintuan ng De La Salle University sa bagong coach na hahawak sa programa ng Green Archers para sa UAAP Season 81 men’s basketball tournament.
Wala pang bagong statement ang La Salle tungkol sa umano’y paglipat ni Ayo sa University of Santo Tomas.
Wala pa rin namang kumpirmasyon na nanggaling mismo kay Ayo o sa kampo ng Growling Tigers.
Subalit ilang pangalan na ang lumutang na posibleng pumalit sa puwesto ni Ayo.
Napaulat na isasama ni Ayo sina assistant coaches McJour Luib at Miggy Solitaria sa UST pero iiwan nito sina Louie Gonzales at Glenn Capacio na siyang mangangalaga sa transition period sa La Salle.
Kaya naman Kabilang sina Gonzales at Capacio sa mga maaaring pumalit kay Ayo.
Lumutang din ang pangalan nina multi-titled PBA coach Tim Cone at Richard Del Rosario.
Sinasabing magsisilbing consultant si Cone habang si Del Rosario ang magsisilbing head coach ng Green Archers.
Tiniyak naman ni dating Rookie of the Year awardee Aljun Melecio na mananatili ito sa La Salle matapos ang kanyang kontrobersiyal na post na dalawang tigreng emoji sa Twitter.
“I am not leaving DLSU. The tiger emojis tweet had no meaning behind it,” ani Melecio na may averages na 10.5 points, 2.7 rebounds, 2.6 assists at 1.0 steal sa Season 80.
Nauna nang namaalam si two-time UAAP MVP Cameroonian Ben Mbala.
Maingay din ang pangalan ni Eric Altamirano na posibleng maging mentor ng Green Archers.
Anim na taong hinawakan ni Altamirano ang National University kung saan nabigyan nito ng korona ang Bulldogs noong 2014.
Kasalukuyan itong assistant coach ng Alaska sa PBA.
Ang anak nitong si Anton Altamirano ang siyang humahawak sa Team B ng La Salle base na rin sa rekomendasyon ni businessman Danding Cojuangco - ang pangunahing tagasuporta ng La Salle.
- Latest