Hosting ng FIBA event mabigat sa bulsa -- MVP
MANILA, Philippines — Expensive!
Ito ang naisagot ni Samahang Basketbol ng Pilipinas (SBP) Chairman Emeritus Manny V. Pangilinan nang tanungin kung magkano ang magagastos ng bansa para maitaguyod ang 2023 FIBA World Cup.
Walang ibinigay na eksaktong pigura si Pangilinan.
Sa halip ay nagbigay siya ng apat na puntos kung anu-ano ang mga pagkakagastusan ng bansa.
“I don't think it is right to be precised about numbers but it has basically four components,” ani Pangilinan.
Una, ang hosting fee na siyang gagastusin sa pagtataguyod ng torneo.
Ikalawa, ang joint marketing commission. Ikatlo, ang strategic partnership kung saan makikipagkasundo ang organisasyon para sa sponsorship hindi lamang sa lokal na mga kumpanya maging sa mga international brands.
Ikaapat, ang profit na hahatiin sa FIBA at tatlong bansa - Pilipinas, Japan at Indonesia.
Mapupunta ang 50 percent sa Pilipinas, habang tig-25 porsiyento ang Japan at Indonesia.
Inaasahang tatabo sa takilya ang FIBA World Cup dahil kilala ang Pilipinas na ‘basketball loving country’.
Muling iginiit ni SBP president Al Panlilio na wawasakin ng Pilipinas ang 35,000 record attendance sa World Cup dahil kayang punuin ng mga Pinoy fans ang Philippine Arena na may 55,000-sitting capacity.
Gusto ni Panlilio na bigyan ang FIBA ng pinakamagandang alaala.
“We want to put up the best hosting that FIBA has ever seen. I know it’s still six years down the road but we have to start our preparations now,” wika ni Panlilio.
Nakapasa ang Philippine Arena at Mall of Asia Arena sa FIBA standards, habang kailangan pa ng Smart Araneta Coliseum ng ilang renobasyon.
- Latest