Alab Pilipinas reresbak sa Hong Kong
MANILA, Philippines — Matapos mabigo sa unang dalawang laro, hangad ngayon ng baguhang coach na si Jimmy Alapag ng Alab Pilipinas ang unang panalo sa muling pakikipagharap sa Hong Kong Eastern sa road game ng 2017 ASEAN Basketball League sa Southorn Stadium sa Wan Chai, Hong Kong.
Ito pa lang ang unang road game ng tropa ni Alapag kaya tiyak sasamantalahin ng Hong Kong Eastern ang home crowd advantage sa kanilang laban sa alas-8 ng gabi.
Makaraang makalusot laban sa Alab Pilipinas, 92-89 noong Nobyembre 19 sa Mall of Asia Arena, nakisalo sa liderato ang nagdedepensang Hong Kong Eastern sa Chong Son Kung Fu basketball team ng China sa parehong 3-0 win-loss kartada.
Ang Alab Pilipinas ay pang-pito sa standing kasama ang Formosa Dreamers sa parehong 0-2 card.
Ang ikalawang talo ng Alab Pilipinas ay sa Singapore Slingers, 83-97 sa Sta. Rosa Multi-Purpose Complex noong Nobyembre 29.
Sa unang pagtatagpo, nilampaso ng Fil-German na si Christian Standhardinger ang dalawang imports ng Alab na sina Ivan Johnson at Reggie Okosa.
Ang 6’8 na si Standhardinger, tatapusin lamang ang anim na buwang kontrata sa Eastern Lions, ay umiskor ng 26 puntos na may kasama pang 14 rebounds, apat na assists at dalawang steals sa unang panalo ng Hong Kong.
- Latest
