PBA opening tiyak na sa Dec. 17?
MANILA, Philippines — Hanggang kahapon ay wala pa ring katiyakan kung matutuloy ang itinakdang pagdribol ng 43rd season ng Philippine Basketball Association sa Disyembre 17.
Ito ay bunga ng patuloy na hindi pagkakasundo ng Majority group na binubuo ng TNT Katropa, Meralco, NLEX, Rain or Shine, Blackwater, Alaska at Phoenix at ng minority faction ng San Miguel, Barangay Ginebra, Magnolia (dating Star), Kia at Globalport kaugnay sa estado ni PBA Commissioner Chito Narvasa.
Sa PBA Press Corps Annual Awards Night kamakalawa ng gabi ay ipinangako ni outgoing PBA chairman at Party List Representative Mikee Romero na mareresolba ang nasabing isyu.
“Rest assured, the 2018 PBA season will start on December 17,” sabi ng Globalport team owner. “‘Iyan lang po ang marereport ko sa inyo — na tayo sa PBA, maayos po natin ‘to.”
Ayaw ng majority group na bigyan ng bagong termino si Narvasa bilang PBA Commissioner matapos nitong payagan ang trade sa pagitan ng San Miguel at Kia.
Ibinigay ng Beermen ang tatlong role players at isang 2018 draft pick para makuha ang No. 1 overall pick ng Picanto.
Ang naturang draft pick ang ginamit ng San Miguel para mahugot si 6-foot-8 Fil-German power forward Christian Standhardinger sa nakaraang 2017 PBA Rookie Draft.
Noong nakaraang linggo ay isang sikretong pulong ang idinaos ng mga miyembro ng PBA Board.
Ngunit wala pa ring narating na kasunduan ang majority at minority groups tungkol sa kapalaran ni Narvasa.
Hindi dumalo si Narvasa sa nasabing PBAPC Awards Night kung saan hinirang si Leo Austria bilang Coach of the Year sa ikatlong sunod na pagkakataon.
Iginiya ni Austria ang Beermen sa korona ng 2017 PBA Philippine Cup at Commissioner’s Cup.
“I have to keep on learning, and even sa mga grassroots pumupunta pa rin ako at nanonood,” sabi ng tubong Sariaya, Quezon na iniuwi ang Baby Dalupan Trophy.
“There’s something you can pick up from them,” dagdag pa ni Austria.
- Latest