Irving bumida sa ika-13 dikit na panalo ng Celtics
Tinirahan ni Kyrie Irving ng Celtics si Spencer Dinwiddie ng Nets.
NEW YORK —Nagbalik si Kyrie Irving sa lineup ng Boston at kumamada ng 25 points para pangunahan ang Celtics sa 109-102 paggiba sa Brooklyn Nets.
Ito ang ika-13 sunod na arangkada ng Boston matapos ang 0-2 panimula.
Nakatakdang harapin ng Celtics ang NBA champions na Golden State Warriors.
“It's definitely an incredible streak we're on, and now comes the whole media frenzy of will the streak end, and what's going to happen on Thursday and the Golden State Warriors coming to Boston,” sabi ni Irving.
Nagdagdag si Marcus Morris ng 21 points at 10 rebounds habang may 19 markers naman si Jayson Tatum para sa Boston.
Hindi nakalaro si Irving sa panalo ng Celtics laban sa Toronto Raptors matapos magkaroon ng minor facial fracture nang masiko sa mukha ni teammate Aron Baynes sa first period.
Ang alley-oop ni Tatum kasunod ang dalawang free throws ni Irving ang nagbigay sa Boston ng 106-96 kalamangan laban sa Brooklyn.
Tumipa si Joe Harris ng 19 points at nagtala si Rondae Hollis-Jefferson ng 16 points at 9 rebounds sa panig ng Nets, naglaro nang wala si leading scorer D'Angelo Russell na may bruised left knee.
Nag-ambag sina Allen Crabbe at Caris LeVert ng tig-15 points para sa Brooklyn.
Sa iba pang laro, hiniya ng San Antonio Spurs ang Dallas Mavericks, 97-91 tampok ang season-high 32 points ni LaMarcus Aldridge habang pinayuko ng Toronto Raptors ang Houston Rockets, 129-113.
- Latest
