Tierro, Patrombon abante sa 3rd round

36th PCA Open Netfest

MANILA, Philippines — Magkaibang daan ang tinahak nina reigning champion Patrick John Tierro at top seed Jeson Patrombon bago humirit ng tiket sa third round ng 36th Philippine Columbian Association (PCA) Open men’s singles kahapon sa PCA indoor shell-clay courts sa Paco, Manila.

Mabilis na nakaba­ngon si Tierro sa masamang laro sa se­cond set tungo sa 6-1, 4-6, 6-1 panalo laban kay Kyle Parpan habang kinailangan lamang ni Patrombon ng sapat na lakas para igupo si Calvin Canlas, 6-2, 6-3.

“Dito sa PCA Open kailangan focused parati dahil malalakas ang mga kasali especially this year. Hindi pwedeng mag-relax kaya kailangan nasa kundisyon everytime na papasok sa court. Sana mas maging maganda ang laro ko sa next game,” wika ni Patrombon na galing ITF Futures tournament sa Hong Kong, China at India bago sumabak sa PCA Open.

Sunod na makakasagupa ni Tierro si John Altiche na umiskor ng 6-3, 6-2 panalo laban kay Ernesto Pantua habang titipanin ni Patrombon si Betto Orendain na nanaig kay Marcen Gonzales, 7-6 (4), 6-3.

Pasok din sa third round sina eight-time champion Johnny Arcilla, ITF juniors campaigner John Bryan Otico, sixth seed Elbert Anasta at eight pick Filipino-Italian Marc Reyes na nagtala ng kani-kanilang panalo sa second round.

Pinatalsik ni Arcilla si Jan Seno (6-2, 6-3), sinorpresa ni Otico si Rolando Ruel Jr. (6-3, 6-1), iginupo ni Anasta si Raymund Diaz (6-2, 6-4) at pinasadsad ni Reyes si John Sonsona (6-1, 6-3) sa event na suportado ng The Philippine Star, Asian Traders Dunlop, Pearl Garden Hotel, Babolat, Tyrecorp Inc., PVL Restaurant, Greenfield Marketers One, Mary Grace Foods Inc., Coca-Cola Philippines-FEMSA, Kraut Art Glass, Manuel Misa at Atty. Antonio Cablitas.

Target ni Arcilla na makahirit ng silya sa quarterfinals sa pakikipagtipan nito kay Argil Canizares na namayani kay Joshua Cano, 6-4, 6-3 habang muling masusubukan ang tikas ni Otico na haharap kay fourth seed Ronard Joven na inilampaso si Rolly Saga, 6-1, 6-1.