PSL tankers kumana uli ng 9 ginto
Ang mga Philippine Swimming League (PSL) medalists sa 2017 Buccaneer Invitational Swimming Championship na ginaganap sa St. Mary’s International School swimming pool sa Tokyo, Japan.
MANILA, Philippines — Tuloy ang mainit na pananalasa ng Philippine Swimming League (PSL) tankers nang sumisid pa ito ng 15 medalya tampok ang siyam na ginto sa pagpapatuloy ng 2017 Buccaneer Invitational Swimming Championship na ginaganap sa St. Mary’s International School swimming pool sa Tokyo, Japan.
Matapos magkasya sa pilak at tanso sa unang araw ng kumpetisyon, bumawi si Wisenheimer Academy standout Marc Bryan Dula nang pagharian nito ang boys’ 9-10 50m butterfly sa bilis na 33.03 segundo.
Nasungkit naman ni Aubrey Tom ang kanyang ikatlong ginto matapos mamayagpag sa girls’ 9-10 200m freestyle (2:30.09). Nauna nang humirit ng ginto si Tom sa 100m freestyle at 100m backstroke.
Nakahirit din ng gintong medalya sina Our Lady of Fatima University tanker Arbeen Thruelen sa boys’ 11-12 50m butterfly (30.60), Triza Tabamo sa girls’ 9-10 50m butterly (34.14), Aishel Cid Evangelista sa boys’ 8-under 100m freestyle (1:16.58) at Kyla Soguilon sa girls’ 11-12 100m backstroke (1:09.48) at 50m butterfly (31.45).
Pinangunahan naman ni reigning Female Swimmer of the Year Micaela Jasmine Mojdeh ang PSL squad sa pagwasak ng rekord girls’ 11-12 200m freestyle relay kasama sina Soguilon, Chloe Laurente at Sophia Barcelo (2:05.38).
Binura rin nina Tom, Tabamo, Martina Estrella at Alexandra Rejuso ang rekord sa girls’ 9-10 200m freestyle relay (2:15.19) habang nakaginto rin ang tropa nina Evangelista, Master Charles Janda, Charles Andallo at Leodd Dalman sa boys’ 8-under 100m freestyle relay (1:10.99).
“They all beat their personal best times. What is amazing is to go beyond what these swimmers can do and even surpassed meet records established by Japanese and Chinese swimmers. This is not within the circle of Asean countries but Asian,” ani PSL President Susan Papa.
Nakapilak din si Mojdeh sa 50m butterfly gayundin ang boys’ 11-12 200m freestyle relay nina Thruelen, Lee Grant Cabral, Albert Sermonia at Raindale Ching, habang may tanso sina Chloe Laurente sa girls’ 11-12 100m backstroke (1:15.02), Joaquin Mirasol sa boys’ 9-10 200m freestyle (2:37.00) at Janda sa boys’ 8-under 100m freestyle (1:22.38).
Sa kabuuan, mayroon nang 18 ginto, pitong pilak at siyam na tanso ang Pilipinas kabilang ang walong ginto, limang pilak at anim na tanso sa unang araw ng kumpetisyon.
- Latest
