Orcollo laglag sa 2nd place

MANILA, Philippines — Isang krusyal na mintis ang  nagawa ni dating world champion Dennis Orcollo sa final round upang magkasya sa runner-up trophy sa 3rd Annual Great Dismal Swamp 9-Ball Classic na ginanap sa Colonia Cues sa Elizabeth, North Carolina.

Nagtamo si Orcollo ng nakapanlulumong 11-12 kabiguan sa kamay ni Jayson Shaw ng Scotland sa championship round ng torneong nilahukan ng 32 matitikas na cue masters sa mundo.

Hawak ni Orcollo ang 11-6 abante kung saan isang rack na lamang ang kailangan nitong linisin para makuha ang kampeonato.

Subalit sumablay ang Pinoy cue master sa 18th rack dahilan upang makabangon si Shaw sa pagkakalugmok upang makuha ang naturang frame para sa 7-11 iskor.

Gamit ang solidong breaks at swabeng pagtumbok, nakuha ni Shaw ang limang sunod na racks para matamis na angkinin ang come-from-behind win.

Naibulsa ni Orcollo ang $2,500 konsolasyon habang nakuha ni Shaw ang $4,000 top purse.

Nasiguro ni Orcollo ang tiket sa finals matapos patumbahin si Sky Woodward ng Amerika sa semifinals sa iskor na 9-5.

Tinalo rin ni Orcollo sina Danny Basavich sa first round at Brandon Shuff sa quarterfinals sa event na nagpatupad ng double-elimination format.

Pinayuko naman ni Shaw sina Jeremy Jones sa first round, Tommy Kennedy sa second round, Shane Van Boening sa quarterfinals at Woodward sa knockout semifinals.

Sunod na sasabak si Orcollo kasama ang iba pang Pinoys sa US Open 9-Ball Championship na idaraos sa Oktubre 22 hanggang 28 sa Norfolk, Virginia at sa Sidepocket Open 9-Ball Championship sa Oktubre 28 hanggang 29 sa Sidepocket Billiards and Darts sa Shreveport sa Los Angeles, California.