Lim, Maquilan pasok sa medal round
ASHGABAT, Turkmenistan - Lumakas ang tsansa nina jiu-jitsu specialist Marc Alexander Lim at wrestler Jonathan Maquilan na makapasok sa medal rounds sa 5th Asian Indoor and Martial Arts Games.
Tinalo ng 20-anyos na si Lim si Arslan Setdarow ng Turkmenistan, 4-0 sa men’s ne-waza -69kg division dito sa Martial Arts Arena.
Nagtala ang 2015 World Jiu-Jitsu Championships bronze medalist ng 4 points sa huling dalawang minuto at 40 segundo sa first round matapos makabuhol si Setdarow sa isang superior position.
Makakatapat ni Lim ng Davao City si Ibrahim Abdulla Mohammed Alhosani ng United Arab Emirates sa quarterfinals.
Umabante rin sa quarterfinals si Maquilan mula sa kanyang 5-0 pagdaig kay Jawid Ahmad Amiri ng Afghanistan sa men’s classic -62kg traditional wrestling sa Main Indoor Arena.
Sasagupain ni Maquilan si Turkmenistan bet Isgender Asyrow sa quarterfinals.
Samantala, nadiskuwalipka si jiu-jitsu fighter Hansel Terrence Co sa kanyang laban kay Saoud Abdulla Yousef Ali ng UAE sa quarters habang nabigo si Gilbert Ombao kay Jonibek Atajanow ng Turkmenistan sa men’s ne-waza -94kg.
Nasibak din sina Apryl Jessica Eppinger (women’s ne-waza -62kg) kay Buyandelger Battsogt ng Mongolia at Lou-Ann Jindani (-70kg) kay Onanong Sangsirichok ng Thailand.
Nauna nang natalo sina wrestlers Michael Vijay Carter (men’s classic -57kg), Cristof Hoffman Jr. (-90kg), Jefferson Manatad (-75kg), Grace Loberanes (women’s classic -52kg) at Noemi Tener (-58kg) sa kanilang mga preliminary assignments.
Sa taekwondo, yumuko si Ronna Levita Ilao kay Fatemeh Madahi ng Iran, 5-10-5 sa women’s -46kg class.
Nabigo naman si middle-distance runner Marco Vilog na makapasok sa finals nang magtala ng oras na 1:56.62 sa qualifying heat ng men’s 800m na pinamunuan ni Jamal Hairane ng Qatar (1:54.54) sa indoor athletics arena.
- Latest
