Football teams ng Pinas talsik sa medal round
KUALA LUMPUR – Tuluyan nang nasibak sa medal round ng football competition ang Philippine men’s at women’s teams sa 29th Southeast Asian Games dito.
Yumukod ang National Under-22 booters laban sa nagdedepensang Thailand, 0-2, para sa lkanilang ikatlong sunod na kamalasan (1-3) sa Group B sa MP Selayang Stadium.
Pipilitin ng koponan ni coach Marlon Maro na ibaling ang kanilang galit sa Timor Leste ngayong alas-4 ng hapon sa UM Arena.
Nakalasap naman ang Malditas ng 0-6 kabiguan sa Myanmar sa Shah Alam Stadium.
May 1-2 baraha, tatapusin ng mga Pinay footballers ang kanilang kampanya sa pagsagupa sa nagtatanggol sa titulong Thailand bukas ng alas-4 ng hapon.
Noong 2015 SEA Games sa Singapore ay nagtala ang National Under-22 squad ng 0-4 marka.
Naglista naman ang Malditas ng 0-2 karta noong 2013 Myanmar SEA Games.
Sa ice hockey, giniba ng Philippine team ang Singapore, 7-2, para sa kanilang ikalawang sunod na panalo sa Empire City Arena sa Damansara Perdana.
Sa nasabing tagumpay ay nagkaroon si Nico Cadiz ng dislocated left shoulder, ayon kay team manager Petronilo Tigaronita.
Nauna nang pinataob ng mga Pinoy ang Indonesia, 12-0, sa kanilang opening match noong Lunes.
Nakatakda nilang labanan ang host Malaysia kagabi bago harapin ang Thailand bukas.
- Latest
