Blackwater puntirya ang pangatlong sunod na panalo
MANILA, Philippines - Matapos ang 0-3 panimula ay dalawang magkasunod na panalo ang itinala ng Elite sa likod ni balik-import Henry Walker.
Sa 92-86 paggupo ng Blackwater laban sa Phoenix ay kumamada si Walker, pumalit sa nagkaroon ng injury na si Trevis Simpson, ng 32 points, 15 rebounds at 5 assists.
Kumolekta naman ang dating NBA player ng 29 markers, 15 boards at 6 assists sa 107-106 paglusot ng Elite kontra sa NLEX Road Warriors.
Sa nasabing panalo ay tumapos si point guard Roi Sumang na may career-high na 32 points, ang 17 dito ay kanyang iniskor sa second period.
“Henry Walker continued to be the inspiration of the whole team,” sabi ni Blackwater coach Leo Isaac sa dating reinforcement ng NLEX.
Pupuntiryahin ng Elite ang kanilang ikatlong sunod na ratsada sa pagsagupa sa minamalas na Alaska Aces ngayong alas-4:15 ng hapon sa 2017 PBA Governor’s Cup sa Mall of Asia Arena sa Pasay City.
Sa ikalawang laro sa alas-7 ng gabi ay magtatapat naman ang Star at Phoenix.
Target ng Hotshots ang kanilang ikaapat na dikit na panalo para patuloy na solohin ang liderato, habang nasa isang four-game losing skid naman ang Fuel Masters matapos ang 2-0 panimula sa torneo.
Huling naglaro ang Star noong Agosto 4 kung saan saan nagbida si 6-foot-6 forward Ian Sangalang para talunin ang San Miguel, 104-98.
- Latest
