Philippines jins sisipa sa World C’ship

MANILA, Philippines - Sasabak ang Philippine Cadet team sa prestihiyosong 2017 World Cadet Taekwondo Championships na gaganapin sa Agosto 24 hanggang 27 sa Sharm El Sheikh, Egypt.

Walong atleta ang ipaparada ng Philippine Taek­wondo Association sa ilalim ng Meralco/MVP Sports Foundation-- apat sa men’s division at apat sa women’s class.

Lalarga sa men’s side sina Lex Joshua Provido (-33 kg), Mico Gabriel Chua (-37 kg), Raphael Ongkiko (-41 kg) at Richard Jude Cajulis (-53 kg).

Susubok naman na makahirit ng gintong medalya sina Arianne Espida (-37 kg), Gerianne Kendall Therese Pineda (-41 kg), Mary Angeline Alcantara (-44 kg) at Maria Carmella Santos (-55 kg) sa women’s category.

May 69 bansa na ang nagkumpirma ng partisipasyon sa pangunguna ng po­werhouse South Korea, France, Spain, Iran, Turkey, Amerika, China, Chinese Taipei, Thailand, Vietnam, Indonesia, Japan, Italy at Brazil.

Magsisilbing delegation head si Hamy Tabua kasama sina coaches Alvin Taraya at Brix Darmo Ramos.

Noong 2015 edisyon ng World Cadet Championships nakahirit ng tansong medalya si Wendil Jay Rama.

Kamakailan lamang ay humakot ang national poomsae team ng dalawang ginto at isang pilak sa 2017 Anyang World Taekwondo Hanmadang Championships na ginanap sa Anyang Gymnasium sa Anyang City, South Korea. 

Ang paglahok ng Pinoy jins sa nasabing kompetisyon ay suportado ng Smart Communications Inc., PLDT, TV5 at ng Philippine Sports Commission.