Puwestuhan na sa semis
Generika vs F2 Logistics; Cignal kontra Cocolife
MANILA, Philippines - Apat na koponan ang mag-uunahang makuha ang unang dalawang silya sa semis sa pag-arangkada ng Philippine Superliga (PSL) All-Filipino Conference quarterfinals ngayong araw sa The Arena sa San Juan City.
Puntirya ng nagdedepensang F2 Logistics na mahablot ang tiket sa Final Four sa pakikipagtipan sa Generika-Ayala sa alas-5 ng hapon habang haharapin naman ng second seed Cignal HD ang Cocolife sa alas-7 ng gabi.
Magtutuos naman sa hiwalay na quarterfinal games ang top seed Foton at Cherrylume at ang Petron at Sta. Lucia Realty na gaganapin sa Sabado sa Malolos Sports and Convention Center sa Bulacan.
Magsisilbing lakas ng Cargo Movers sina UAAP Season 79 MVP Majoy Baron at dating UAAP Finals MVP Kim Kianna Dy kasama sina outside hitters Desiree Cheng at Tin Tiamzon, middle blocker Aby Maraño, setter Kim Fajardo at libero Dawn Macandili.
Kailangan naman itong tapatan ng Lifesavers sa pangunguna ni national team member at team captain Gen Casugod kasama sina Fiola Ceballos, Patty Orendain, Chloe Cortez, Acy Masangkay, Shaya Adorador at Angeli Araneta.
Lalarga naman para sa Cignal sina Rachel Anne Daquis, Honey Royse Tubino at national team stalwart Jovelyn Gonzaga gayundin sina Cherry Vivas, Maica Morada at veteran playmaker Chie Saet.
“We can’t afford to have a slow start in the next round. Things are definitely going to be very tough from here. We have to work on our previous lapses and make sure that we are ready for battle,” sambit ni Cignal coach George Pascua.
Galing naman ang Asset Managers sa morale-boosting 25-22, 25-16, 25-19 win laban sa Cherrylume noong Martes.
Subalit kailangan ng Cocolife na ibuhos na ang lahat ng lakas nito upang pigilan ang anumang pagtatangka ng Cignal.
- Latest
