Otico kampeon sa ITF Jr. netfest

MANILA, Philippines - Naibulsa ni top seed John Bryan Decasa Otico ang kam­peonato sa 2017 International Tennis Federation (ITF) Junior Championships boys’ singles na ginanap sa National Tennis Development Center sa Nonthaburi, Thailand.

Halos hindi pinagpawisan si Otico na nangailangan lamang ng sapat na lakas para mabilis na pataubin si se­venth seed Sacchitt Sharrma ng India sa pamamagitan ng 6-2, 6-1 demolisyon sa championship round.

Magandang regalo ito para kay Otico na nagdaos ng ika-18 kaarawan kahapon.

Kabilang sa mga pinataob ni Otico sina Natthayut Nithithananont ng Thailand sa second round (6-1, 7-5), Keisuke Saitoh ng Japan sa third round (6-2, 6-2), Huang Liangxiang ng China sa quarterfinals (6-4, 6-4) at 12th pick Akanit Pumjit ng Thailand sa semis (6-4, 6-4).

Ito ang ikatlong korona ni Otico sa taong ito.

Nakahirit ng titulo si Otico sa singles ng Hong Kong ITF Junior Tennis Tournament sa Hong Kong noong Enero samantalang umani ito ng doubles title kasama si Seito Watanabe ng Japan sa China ITF Junior Championships sa Beijing noong Mayo.

Kasama rin ni Otico sa naturang Grade 4 tournament sina second seed Arthur Craig Pantino, Filipino-Spanish Diego Garcia Dalisay at Stephan Lhuillier na una nang namaalam sa kontensiyon.